పిచ్చి నిద్ర

రోజూ నిద్రని ఉరికంబం ఎక్కించి

కలలు కల్లలోంచి ఎగిరిపోతుంటే చూస్తూ

గబ్బిలాల్లంటి జ్ఞాపకాలు

మొండిగా ఆ కొసలలొ వ్రేలాడుతూ

చనిపోబోతున్న నిద్రని చూసి

జాలిపడ్డం మామూలయింది

ఎందుకు అంతగా ఆశ పడతాయో

ఆ కళ్లు

చీకటిని అణువణువు అలుకుకొని

రెప్పల తలుపుల ఘడియలు సరి చూసుకుని

తలపుల చీరతో సింగారించుకుని

నిద్రతో సరసాలాడాలని

రోజు ఎదురు చూస్తూనే ఉంటాయా

ఏంటో

ప్రేమ

ఎడబాటు బాణాలని సంధించి

కళ్లని స్వాధీన పరుచుకుని

నిద్రని

రోజూ తిన్నగా ఆ కళ్లను చేర నిస్తేగా??

మధ్యలోనే తెలియని ప్రశ్నల ముగ్గులో దింపి

స్థిమితత్వం కొల్పోయాకా

పిచ్చి అంటకట్టి

అది ఒప్పుకోలేక తిరగ బడిందని అన్యాయంగా

కలతల కోతల్లో జీవితాన్ని భాగిస్తూ మరీ

ఉరి కంబం ఎక్కిస్తుంది...

                                 by mercy margaret( 19/10/2012 )-