ఒహ్ నువ్వా ..

ఏం  చేయను ?

నిశబ్ధాన్ని 

దోసిళ్ళతో  నింపుకొని

కొంచెం కొంచెంగా సేవిస్తున్నా

ఇదో

మాటలన్నీ  గొంతు కొలన్ను ఒంటరి చేసి

రెక్కల శబ్ధం రాకుండా

ఏ నిశీధికి తరలి వెళ్ళాయో??

ఎండి  ఎడారిగా మారిన

కంఠం నేలకు మొహం వేసి

యెవరో  వస్తారని

ఎదురు చూస్తూ

శబ్ధాన్ని మెళ్లిగా  తనలో

పూడ్చుకుంటూ

చచ్చు  విత్తనాలుగా మారిన ఆలోచనల్ని

గొంతునులుముతూ

ముళ్ళ కంపల్ని పుట్టిస్తూ

తలపుల్ని

మధ్యాహ్నప్పు వెలుగులో

ప్రమిదని చేసి

చీకటి వెలుతురులు  ఒకటే

అని చూపిస్తూ

అందరిలో నువ్వు ఒకడివయ్యవా  అని వెక్కిరిస్తూ

విధి నాతో

తెలియని ఆటలేవో

ఆడుకుంటుంది

ఏ ఆట అయితేనే

ఇన్ని మర బొమ్మల్లో నేను ఒక బొమ్మనై

సహజత్వాన్ని సమాధి చేసుకొని

అస్థిత్వం ,ఉనికి  కోసం

ఉత్సాహాన్ని కొనుక్కొని మరీ

పోటి పడాల్సి వస్తుంది

నాతో నేనే

---------- by Mercy Margaret (18/10/2012)--------------