ఒక సారి విను

నదులౌతాయి
చేతులు,
గాలిలా నీ చూపులు నన్ను తాకగానే 
ప్రవహిస్తూ వచ్చి 
నీ చేతుల సంగమంలో 
సేద తీరుతూ ఒదిగిపోతాయి 

పుస్తకాలవుతాయి నా చేతులు
నీ మాటలు అక్షరాలై వాటి మీద పరుచుకుంటే
నీవై గీతాలు గీతలుగా
కొత్త కధలేవో రాసుకుంటాయి

అప్పుడప్పుడు
నా వేళ్ళ కొమ్మలకు ఊయల కట్టి ఊగుతూ
నీ జ్ఞాపకాలు నక్షత్రాలై
చేతుల వృక్షాలను అంటుకొని
రాతిరి పుష్పాలై
మెరుస్తుంటాయ్

అందుకే నిన్ను ముట్టుకున్న ఈ చేతులంటే
నాకెంతో ఇష్టం
నీకోసం ఎప్పుడు తెరుచుకునే ఉంటాయి