ఒక పరిచయం ముగుస్తూనే
రెండు
అపరిచిత ఆకులను కుడుతూ
పూచిన పువ్వు రాలిపోతూ
సంభందపు సుగంధాన్ని
గుర్తుగా మిగిల్చి పోతుంది
ఒక పరిచయం ముగుస్తూనే
పగలు నుండి రాత్రిని
వేరు చేసె కవ్వమేదో
మనసుని చిలికి
జ్ఞాపకాల వెన్నని చేతిలో
చంద్రుని ముద్దగా ఇచ్చి పోతుంది
ఒక పరిచయం ముగుస్తూనే
తలుపులను మూసినా
ఖాలీ సందులనుంచి ప్రయానిస్తూ
ఒక రాగం మూసిన చెవుల గోడలను కూల్చుతూ
అందమైన అందమైన ఉద్యానవనాలను
చెవులకు వేలాడదీస్తుంది
ఒక పరిచయం ముగింపు ..
ముగింపు కాదది
మరో జన్మ కోసం
అడుగులు వేస్తున్న ఆత్మ తపస్సు
మూసుకు పోయిన కళ్ళ వెనక కధలు రచిస్తూ
గాలితో జతకట్టి
హృదయాన్ని స్పృశిస్తుంది
