కొన్ని సార్లు

వాకిలి ఈ -సాహిత్యపత్రికలో వచ్చిన నా కవిత

కొన్ని సార్లు

మొదలు ఎక్కడ పెట్టాలో వెతుకుతూఉంటా

నాలో ఆలోచన నిలువునా చినిగిన స్థానాన్ని


కుట్టుకోడానికి

లోపలికెళ్ళే దారికి గుమ్మం ఎదురుగానే ఉన్నా


కొన్ని సార్లు

ప్రశ్నలను పిడికిలిలోనే బంధిస్తూ తిరుగుతుంటా

గాయం మౌనం మిళితమై హృదయపు పునాదులను

కదిలిస్తున్నా

ఉదయం లాంటి నవ్వు నా పిడికిలో అస్తమించడం

ఇష్టం లేక


కొన్ని సార్లు

రాలిపోతుంటా

నాలో అగమ్యాలు రాలి గమ్యం చిగురించేలా

నిశబ్దాలను చీల్చుకుని

వసంతపు శబ్ధం నాలో జనిస్తుందని ఆశగా

కొన్ని సార్లు

నాలో నేను

మళ్ళీ మళ్ళీ పుడుతుంటా

అవమానాల్లోంచి విజయంగా

నిరుత్సాహంలోంచి లేలేతగా

చనిపోయిన ఓటమిలోంచి

నన్ను నేను నిర్వచించుకుంటూ కొత్తగా

---------------------------------------------------------------
http://vaakili.com/patrika/?p=478#comment-313